Sole Mio

Open Now

Now Closed

同新朋友去食西餐，從中環至半山自動扶手電梯一路搭上嚟半山就會去到呢間樓上意大利菜舖頭。可能因為呢頭都多西餐而且呢度已經係比較高嘅位置，所以客人不多，平日成晚只有我哋呢枱。一個dinner set有前菜、主菜同甜品或飲品，只係$300內一個人，以意大利菜嚟講算幾抵。前菜嘅焗蒜頭同bruschetta已經好有驚喜，個包焗到好脆好香口。主菜有唔少意粉同薄餅選擇，我揀咗個linguine alle vongole，味道清清地有淡淡嘅白酒香，啲蜆份量唔錯而且感覺幾新鮮，linguine真係煮到al dente，擺碟都相當靚。甜品係standard意大利嘅Tiramisu，食落不過不失。食飯途中老闆幾次聊我哋傾計，又介紹呢度每星期都有跳舞班/跳舞活動，各方朋友們可以嚟玩下，而餐廳環境都有傳統意大利餐廳嘅vibe，加上客人唔多所以坐得好舒服。整體而言係間我會考慮encore嘅餐廳。