祺森冰室

Open Now

Now Closed

趁長假期最後一天出走到坪洲，寧靜的小島假日遊人眾多。島內小店集中於兩條小街分別為永安街和永興街，而小島觀光景點欠奉，只好寄望尋找人氣美食。行晒兩條街排最長龍的是祺森冰室了，吸引人的地方在於相中四件脹卜卜賣相靚仔的蝦多士。蝦多士套餐 $47單叫蝦多士四件$40略貴，加$7轉套餐較令人接受。蝦多士炸得金黃外型飽滿，未食對它充滿期望。外層的確皮薄鬆脆唔油膩，而內餡蝦肉數小粒溝左薯蓉口感一般，碟邊沙律醬醮上食比較美味。咖喱吉列豬扒飯 $53豬扒預先切件幾好，可惜炸皮與肉分離，沾麵粉過多所致，咖哩汁香辣，撈飯食唔錯。椰香菠蘿冰 +$12清涼解渴之選，飲落陣陣椰香味，仲好多新鮮菠蘿肉，誠意十足。Tiramisu味紅豆冰 +$12紅豆大大粒非常飽滿，飲落淡淡咖啡味，幾特別，可以一試。