新記煲仔雞粥 (Closed)

記得好耐之前有一次唔舒服，男朋友就帶左我黎呢間粥鋪食雞粥。雖然個次唔舒服，口寡寡咁，但係我記得當時食既粥好易入口，唔舒服都食得落～今日閒來無事又同男朋友黎左食粥，今日就唔只叫左雞粥啦！仲叫左薑蔥炒田雞，拍青瓜，椒絲腐乳通菜，同炸兩。先黎拍青瓜，個味同平時食開既唔係好同，呢個比較甜，我覺得一般，因為我都係鐘意食醋味好勁既拍青瓜。椒絲腐乳通菜捧過黎個陣我o左下咀，佢真係好大兜。。。好似係其他地方都無食過咁大兜。我一向都好鐘意食通菜，加上佢睇得出幾新鮮，唔錯～薑蔥炒田雞比我想像中好食。田雞係男朋友想食既，我本來唔係好鐘意，但係佢炒得又的確幾好食。應該有走過下油，又落左薑蔥去炒香佢，完全唔會有腥味，肉質又有啲似雞肉，幾好食！跟住既炸兩，皮又滑又薄，夠新鮮。但係有個地方唔夠好，就係個豉油略嫌咸左少少。最後就係主角，貴妃雞粥！粥底好綿，貴妃雞既味道完全融入左個粥底，真係好香好好食！而且入面都有唔少雞件，唔會話只加左啲味又無肉食，好滿足！最後叫左兩杯野飲，我既豆漿幾好味，唔會太甜，豆味都ok。呢間粥鋪好多野食，又有小菜，又有粥，炒粉麵等等，而且價錢又唔貴，得閒一定再黎食！