Home Food Plus (Closed)

經朋友介紹嚟呢度食私房菜，其實係一間小菜館，座位唔多，原來我哋六個人以上先可以食呢個餐，唔怪得知我朋友湊腳食。嘩！睇餐牌原來前後有成12道菜包括前菜同甜品。食私房菜就去食一啲出面唔係成日食到嘅嘢，今次係由我朋友發板，聽朋友講呢間店由一位名人女老闆開，今日有幸經朋友認識佢，佢好熱情咁走過來介紹啲菜式，原來啲咁特別嘅菜式真係佢以前屋企招呼賓客用嘅，但係由於啲賓客想食時唔可以成日去佢屋企食，就開咗呢間小菜館，咁真係正式私房菜了。餐牌12道菜未能一一介紹，我每個部份講少少，例如前菜最吸引我就係呢一個話梅冬瓜葡萄，能夠將一個咁簡單嘅冬瓜變成前菜仲要咁好味。另外就係呢隻京蔥吊燒雞，好多京蔥放在上面好似個雀巢，皮又脆又香，內裡好嫰滑，吃的時候就係要伴着這個京蔥吃。甜品方面，呢個菊花梨蜜胖大海真係好吃得不得了，而且個賣相好靚，我現在先知道「胖大海」原來係對喉嚨好嘅一種草本，我還是第一次吃呢！整體來講，係非常滿意嘅一餐，雖然環境係有啲嘈，不過好明顯呢度不是食環境的，反而係食氣氛，因此價錢好合理，12道菜$580一位，如果呢餐飯有海景睇或者包廂嘅話，相信要雙倍價錢以上了。