提議左唎間潮州私房菜, 聽朋友講夜晚好難book, 趁中午就去試下
灣仔地鐵站C出口一上地面就已經見到佢既招牌, 地點好方便就腳, 約朋友黎都唔怕搵唔到路
餐廳響樓上, 入門口要行一層樓梯條樓梯, 都裝飾得好靚
我地得兩個人, 試唔到太多野食
今次就只叫左胡椒豬肚湯、糖醋伊麵、滷水雙拼、地道韮菜粿同反沙雙條
一煲胡椒豬肚湯既份量岩岩好分到4碗, 每人２碗, 好滿足!因為我好鐘意飲胡椒豬肚湯
胡椒味好濃, 飲完個人即刻暖哂, 好岩秋冬天飲
而且豬肚清洗得好乾淨,仲好淋身
湯料好足, 不過湯就咸左少少
滷水雙拼我地叫左鵝片拼鵝掌翼, 滷水味好香唔會太咸, 鵝片唔肥仲好嫰
至於鵝掌翼亦滷得十分入味, 但唔會太咸, 淨食可以停唔到口
糖醋伊麵係煎到香脆既麵底上撒啲砂糖同浙醋
甜甜酸酸再加上脆脆地既麵
口感同味道都好特別, 值得一試
不過我自己就麻麻地鐘意啦
韮菜粿係一個傳統潮州家鄉小食, 用左好似粉果咁既澄麵皮包住已調味既韮菜再拎去炸
咬開熱辣辣, 表皮脆得黎又煙韌, 仲有好香既韮菜
不過我自己都係麻麻地鐘意
最後個甜品係好難整既反沙芋頭同蕃薯條, 一般市面都只會有反沙芋, 但呢到既然有埋蕃薯, 有驚喜!
反沙雙條既糖皮薄身, 好脆, 咬開仲有陣陣蔥油味, 味道夠哂正忠
呢道甜品易學難精, 好多潮州店都無賣, 大家記得黎呢到試一試
