當日我同朋友兩個人到餐廳之後，原先安排我地坐係廚房出餐附近嘅位，但由於店員要求我朋友坐入啲，因為我地張枱同後面卡位好近，坐係通道嘅話就要推好入張凳，變相坐得好迫，最後我地轉移到店舖右手邊圓枱。
雖然圓枱寬闊，但變相冇冷氣，一邊食一邊滴晒汗，特別而家每日都30度左右。
講返食物，我地叫左兩個小食同兩個餐，再加個肉骨茶。
由好食開始講，
#1 加13蚊嘅肉骨茶
個人覺得肉骨茶味道好夠，唔淡，不過裡面湯渣好少，得豆卜一舊，一舊肉同一堆杞子。鐘意飲肉骨茶嘅可以一試。
#2 D24榴槤炸彈
本身當店員放係我面前，我抱住好難食嘅感覺。但冇諗過好重榴槤味，雖然外面炸到好乾好燶，但入面仲係好流質嘅榴槤餡，留意返18蚊兩粒係唔會有榴槤肉係入面。
但朋友一咬開已經聞到一陣榴槤味，好香，當然我都有食埋一份
由第3位開始，已是不太推薦系列。
#3 老鼠粉
店員擺低之後第一句就係叫我撈左個蛋黃先，撈完個粉有蛋花咁。
我有個貼切形容，呢個粉似茶記嘅乾炒牛河個河底，即係得豉油味嘅老鼠粉。
裡面有花生，好咸嘅乾魚仔，少量蝦仁，食落好似冇咩餸配襯。
呢個粉只能講正常水準。
#4 咖央鮮油多士
我係為想食甜嘅咖央而叫，先唔好提賣相一般，裡面牛油多到好似食菠蘿油咁，喧賓奪主。
內層麵包只有好薄一層綠色咖央醬，完全冇我想要嘅野，全都是牛油。
#5 海南雞飯配海鮮喇沙滲滲
呢個飯主要我朋友食，我只試食幾啖，當時冇影低相。
味道方面，唔好食，啲雞預左係冰鮮雞，但真係冇味。油飯似香料飯，唔係呈黃色，似淺啡色。
個滲滲係我食咁多馬拉野以來最經典，佢係辣椒油湯底，唔係喇沙。個滲滲唔似出面賣嘅，就咁米粉一碗，海鮮兩隻字仲搞笑，俾條蟹柳咁就算，仲有半隻熟蛋同豆卜。
飲品方面要左杯凍咖啡同熱美綠，凍咖啡唔甜，美綠就少甜，我地冇要求加減糖。
價錢雖然唔算得上貴，但如果為左想食馬拉野，近嘅我會建議去太安樓後面一間食肆，味道好食好多
總括而言，此食肆我未必再試。
由於有兩款食物為可一試系列，故此我用OK作評價。
（全自費）
