頹飯 (Closed)

係中環要搵一間價廉物美嘅餐廳真係唔易，眾裡尋他，終於俾我發現咗係利源東街新開嘅頹飯。頹飯嘅定位係外賣飯盒店，夫妻檔上場。諗唔到係中環一帶$40-60就食得到一個午餐，可以話係中環上班族嘅恩物。雖然叫頹飯價錢又抵，但係一啲都唔頹，即叫即煎之餘，餸菜都非常巧究，餐肉係厚切，雞腿係無骨，豬扒係一口鬆軟，睇得出同普通茶餐廳又有啲唔同。今次就叫咗黑椒汁牛仔骨意粉，落單唔洗5分鐘就有得拎，方便趕住做野嘅人。一打開蓋，真係好驚喜，首先分量好大，意粉超多，牛仔骨有7塊。而且估唔到牛仔骨骨肉分明，骨少肉多，有少少脂肪，而沾上黑椒汁嘅牛肉非常惹味，又唔會蓋過肉汁嘅鮮甜。而一向對飲品要求好高嘅我，都覺得佢嘅凍檸茶水準好高，由紅茶沖調，加上幾片檸檬，清香，唔會淨係得個甜味或者濃味。