逸 壽司 (Closed)

記得之前嚟過呢間逸壽司CP值幾高。Omakase最平都係$400，已經有10件壽司同手卷同其他野。不過我見到佢宜家有個自選壽司10件$198，咁啱有去開嗰頭，就去咗食飯。迷你海膽杯🍸見到隔籬枱有份好誇張嘅迷你魚生飯，問師傅佢話係小食😅底一層飯，上面加大量吞拿魚蓉，再加兩隻大海膽，仲有幾羹三文魚籽，差D滿瀉。加埋份量有成碗飯咁多，得1/4係飯，我唔執輸叫多一碗。自選十二件壽司🍣剔紙仔有成31款揀，最多每款叫兩件(大拖羅限1件)，我就叫12件唔同(見圖)，壽司整體可以的，份量食材都有良心。赤身、魷魚等都𠝹斷晒D筋易食D。昆布醬油漬吞拿/山葵八爪魚D野食未嚟之前，問有乜嘢小食推介，師傅裝咗D 昆布漬吞拿/山葵八爪魚俾我試吓，昆布漬吞拿好味，有啲似肉鬆。山葵八爪魚就有得趙下。