之前聽住長沙灣既朋友講開有間素食舖晚餐好食兼抵,一於帶埋女朋友一齊試試。
入到去見到間餐廳裝修簡樸得黎非常乾淨，亦有好幾個觀音雕像同佛經掛牆，感覺好實而不華。
侍應見我地兩個人入黎，就二話不說介紹我地點個好抵食既二人套餐。$168晚餐 包湯包飯包自選三款小菜之餘都仲包埋是日甜品，認真抵食。
湯方面我地揀左飲金湯海皇翅。 侍應一窩咁呈上黎，個份量真係多到令人驚訝。 金湯入面既橙黃色主要係源自南瓜，再佐以金菇， 粉絲，蟹柳等等既配料，飲落鮮甜可口，再點醋飲風味尤佳。
小菜方面我地首先叫左個菠蘿咕嚕素球。 其實姐係齋版既咕嚕肉。呢味菜無論係味道抑或口感，都同原版咕嚕肉極為相似，我女朋友食第一啖仲問我究竟係咪真係齋黎，因為佢都分唔清。
呢味杞子雲耳浸淮山可謂可口非常。廚師將鮮淮山切到薄薄地一片片咁， 淮山食落去既口感首先係脆，然後滑，最後先有粉既質感，層次豐富，加上爽口既雲耳同上湯餵煮，清淡得黎亦好入味
南乳家鄉齋可以話係傳統齋舖必有菜式，一間齋舖功架掂唔掂睇佢南乳齋質素都已經睇到端倪。正如前述，呢間野質素都有返咁上下，大家試過就知。
甜品方面有紫米露。我女朋友個日興起好想食椰汁杏仁露，所以我地另外再叫。提提大家，呢度杏仁露既杏仁味超濃，杏仁控必點！
