我彈性時間工作，所以經常四出搵食，yoho mall開哂之後，唔洗問梗係逐間試。
我嘅宗旨係，即使明知有機會中伏都要試一次。點知就係咁唔好彩，好耐冇食過一餐咁垃圾！
我同同行嘅人，一人order咗一個lunch set：
$118 烤鴨肉pizza
$168 煎鱈魚西班牙火腿卷
對唔住 無影相 因為本來冇寫食評嘅習慣，亦都無影難食食物嘅習慣！
①先講跟餐薯仔湯，普通到唔想提，冇薯仔味，亦冇薯仔香。
②烤鴨肉pizza
嚟到我以為自己眼花，佢竟然用百佳裡面D熟食檔都可能好食過佢的超薄片煙鴨胸鋪喺pizza上面，就話自己係烤鴨肉pizza！唔係用任何方式處理過嘅鴨肉！而係煙鴨胸！傻的嗎？唔使個個都係食家丶你都尊重下自己個餐牌！有咩特色可言？我自己唔識買煙鴨胸鋪pizza？個crust冇問題，嗰醬比較鹹，佢其實搵第二啲無咁敷衍嘅toppings會好D。
③煎鱈魚西班牙火腿卷
呢碟垃圾我哋一度想退回去，未擺正個碟已經聞到一陣腥味，但佢係熟嘅。我真係冇誇張，佢哋真係唔識煎一條簡單嘅鱈魚！食唔倒任何帶出鮮味嘅seasoning，只係一路食一路覺得想吐返出來，因為佢仲用勁難聞、好似放耐咗嘅金華火腿味嘅級數嘅所謂"西班牙火腿"，去包住呢舊充滿腥味嘅魚來煎！好恐怖！冇諗過呢D難食成咁嘅嘢可以喺呢種餐廳食到！我自己整得好味過佢一千倍！大佬！魚嚟咋！魚都未煎得好就學人開餐廳！？仲好似serve signature dish咁嘅plating！拌菜沙律同拌菜焗薯仔都落勁overwhelming呲芥末醬！要闢味定fusion？
④連咖啡都難飲！想順返條氣都唔成全我！唔使飲你手工咖啡，一般西餐廳嘅即磨都唔會淡成咁，你啲豆放耐咗？hea到爆！
由頭難食到落尾，呢個價錢SOHO都食到優質嘅午餐，我好想死……難為我身邊嗰個！係我撩佢試呢間，人哋仲食開啲靚魚……
