豐記魚蛋粉 (Closed)

邊度都唔想去，收工是但食個晚餐就返屋企休息。路過見到有大量坐位，晚市只得一兩個食客，又會靜得咁誇張既？牛雜撈粗走肺走蔥，講左不下三四次，四眼叔叔侍應硬係唔明我講咩野，我都開始唔耐煩喇。隨後後生仔侍應聽到就過黎跟進一下，事情完滿解決。叔叔似乎新上任喎，無緊要，慢慢學。牛雜撈粗走肺走蔥，粗麵好濕淋淋喎，仲有點溶溶地既感覺，質地尚算滑彈合格，係太濕唔乾爽而影響口感囉。撈上蠔油大大束地啜，蠔油好咸呢，要調調去喎。潮興旺蠔油太甜，豐記就太咸。清湯好味喎，非常香甜，跟上次魚蛋河湯底有天淵之別，飲晒成碗湯都無話頸湯，真材實料，good！芥蘭有驚喜，居然鮮甜爽脆，難得。牛腸浸到好深色喎，勁咸！牛肚軟棉棉，都係偏咸，其中有件帶濃厚羶味，好驚。牛膀外層嚥韌裡面棉，無牛肚牛腸咁咸，香甜正常，好味道啊！辣椒油仍舊唔多掂，叫做好過無，微香唔辣而且咸。