八鍋堂．中日火鍋專門店 (Closed)

天氣凍到打冷震 打邊爐烚下烚下就最啱呀！如果有得食埋放題就更加錦上添花！依家八鍋堂就滿足到你兩個願望！有得打邊爐又有得食放題，好得意！哩間餐廳裝潢幾骨緻，店員好熱情招待，由入門到嗌野食都招呼周到，仲好耐心咁回應我啲問題，值得一讚！我同朋友叫咗四格湯底嘅火鍋，揀咗麻辣，皮蛋芫茜，豬骨同埋蕃茄湯底！真心好正，一次過可以試曬四種湯底，最啱多人一齊食，配合大家唔同口味，唔洗爭！麻辣湯底香材好足，原本見佢一拎上黎個湯好紅，望落好似好辣都淆淆地，但原來係越煲越入味，辣味亦係慢慢滲岀黎，好有驚喜！豬骨湯更加入味，入面真係有大大舊豬骨，骨膠原多到爆，啱曬女仔！蕃茄同皮蛋芫茜亦都好岀色，味道濃郁之餘，湯底嘅材料都好足！我地都叫咗唔少野，有肥牛、滑雞件、木耳、魚滑，仲有蠔，象拔蚌等等嘅海鮮，份量要幾多係自己寫，夠曬方便，亦無漏單情況，唔錯！打緊邊爐嘅同時，另一邊都有食刺身魚生，全部野都幾新鮮，而且上菜上得好快！幾有效率。仲可以選擇其他天婦羅同埋熟食，多重享受。一邊打邊爐一邊食放題嘅感覺真係雙重享受！