做完facial 一離開美容院，又一場豪雨。本來想找間餐廳食個晚餐，都已經變得冇晒心情。想快啲返屋企。既然咁大雨，速遞都唔會送啦唯有自己嗌外賣！
就嚟到厚福街，我覺得係外賣嘅天堂。唔同種類款式嘅食物都應有盡有！而且價格都幾實惠。
見到有間串燒店，返去配個啤酒飲下都好喎！叫咗一個二人套餐外賣要加多$5 ，價錢都幾OK啊又有四款海鮮，有肉，最緊要係有燒茄子啊！！！燒茄子係食串燒不得不出現嘅~
返去同爸爸一齊啤啤佢~ 大概等咗10幾分鐘呢食物就已經齊，拎得啦！覺得店員都幾好，會話你聽隻茄子係生燒，所以真係要成20分鐘。既然落雨都冇地方去咁就坐低等吓。
佢哋用錫紙盒包裝，我返到港島區啲食物都仲係熱辣辣嘅！讚！
呢度連兩罐飲品$380。
茄子超級好食，舖上菜脯蒜蓉蔥同辣椒仲要燒完都好濕潤好好食。
又大條！好食過屋企附近某某知名燒烤店！
新鮮嘅燒蠔，同扇貝，扇貝上仲有好食嘅粉絲添。欣賞佢哋嘅海鮮都係可以保留到好多水份鹽唔會好乾。正！
燒大蝦真係好大隻大過我隻手~ 蝦肉彈牙唔會乾！
佢哋嘅外賣呢都有啲心思㗎，擺位呢有諗過度過，大家可以安心外賣返屋企慢慢食。唔會驚啲汁撈嚟撈去。
太耐冇食過台灣腸覺得呢個真係好好食，雖然係普通嘅台灣腸，但冇得去旅行之後變得格外珍貴
呢個份量呢二人食都有啲多，爸爸一路食一路話嘩好抵食喎！四個海鮮十串串燒仲有原條茄子，滿足滿足。下次要叫再辣啲先~
