津屋爐端燒 (Closed)

大雨無阻我哋搵食的決心，做完運動唔想食太飽，老公就提議食串燒。去到九龍城的津屋爐端燒，有點意外今日食客唔多，可能係因為大雨的關係啦。店內俾人的感覺好輕鬆，彷彿外面的狂風暴雨與我哋無關。店員首先送上前菜，俾我哋開一開胃。由於我哋都唔想食太飽，就只係點左一下卷物、三款燒物同我最鍾意的豆腐。牛油果軟殼蟹卷一客非常大份，有六件。軟殼蟹炸得香脆，牛油果亦好fresh ,如果上枱能再熱一點會更好。櫻花蝦豆腐非常惹味，佢哋的櫻花蝦唔單止鋪喺豆腐的頂部，而係均勻地沾滿豆腐的每一面。表面的櫻花蝦脆脆，內裏的豆腐滑溜，口感獨特。BB青椒黑豚肉卷非常有創意，通常黑豚肉都係捲着露荀，而佢哋就捲着細細件的青椒。黑豚肉的油脂重，同青椒清新的味道中和，恰到好處。呢個雞肉棒為我地帶來了小驚喜，雞肉當中混入了細細粒的雞軟骨，口感更有層次。粘在雞肉棒上的醬汁混入生雞蛋，好特別。我哋都想試一試呢度的燒魚，就選咗燒鯖魚。呢個燒鯖魚做得好出色，火候恰到好處，香脆的表皮下是嫩滑的魚肉。而且味道亦調得很好，不會過鹹，亦能突出鯖魚獨特的鮮味。最後店員更送上雪糕，小溫馨的舉動。雖然唔算十分飽，但兩個人都試到好多款美食，埋單也是400有