最近大家都好努力抗疫，呢到暫時係我食過為抗疫做得最好準備嘅食肆。入門前量度體溫呢啲基本嘢當然有做，而且安排座位細心，每枱客隔一張枱，好有空間，另外仲煲定一大盤滾水俾我哋消毒餐具，真係好貼心，令人食得好安心。
🌪招牌白胡椒蟹
呢個白胡椒蟹真係好正！一上菜已經聞到好香！好有鑊氣！
隻蟹大大隻，好多肉，特別係隻蟹鉗食落啖啖肉，仲有肉汁，而且佢哋嘅白胡椒香氣十足，好惹味！下次絕對要再返嚟食過！
🌪燒味拼盤(叉燒/腩仔/海蜇)
叉燒肉味香濃，好juicy😋腩仔外皮超鬆脆；而且腩肉肥瘦比例適中，油脂甘香又會唔會膩；海蜇爽脆彈牙，少少辣好開胃。
🌪花膠元貝燉螺頭
燉湯味道濃郁，非常足料，每啖都係精華所在！湯底清，冇咩油份。花膠元貝夠腍夠入味！有埋螺頭，唔怪得啖湯寧舍清甜！
🌪西蘭花炒帶子蝦仁
賣相擺盤都唔錯，帶子蝦仁鮮味十足！帶子嫩滑，蝦仁彈牙！西蘭花爽脆夠味。
🌪西施龍躉球
龍躉蒸蛋白，睇到都覺得好有骨膠原。龍躉肉質結實，口感嫩滑，而龍躉下嘅蒸蛋白，吸收哂龍躉嘅鮮味同肉汁，滑溜之餘好有鮮味。
🌪乾隆石鍋炒飯
炒飯炒得乾身香口，配埋熱辣辣嘅石鍋，真係好啱冬天食。炒飯用料豐富，鍋底仲有啲脆脆飯焦！好正！
🌪紅豆沙
好有陳皮香氣，甜度適中，啲紅豆仲起哂沙，媽咪都食得好滿意，係咁大讚👍🏻
