日月堂

Open Now

Now Closed

呢間確實係我近期排隊等得最耐嘅餐廳，餐廳位於工廠大廈嘅4樓，喺走廊等位嘅時候其實都幾焗，空氣唔係好流通，星期五晚等咗足足一個鐘，終於都可以入。裏面嘅位都算幾闊落，有好多張枱。你都台式餐廳，梗係要試吓佢哋嘅牛肉麵，我哋一人叫咗一碗，一碗係紅燒湯底，一碗係清燉湯底。我嗰碗加左$5轉做刀削麵。呢個係本身碗麵配嘅幼麵條，比較淋冇咬口，好處係好掛面，但紅燒湯底普通，豆瓣醬味偏重。至於牛肉，係比牛腩部位，肉質還可以，但無咩牛肉味，牛筋就入味而且好軟身。清燉湯底比我想像中深色，但都尚算清甜，係刀削麵令我有啲失望，因為佢係759買嗰隻刀削麵，非常薄，一啲唔煙韌，下次可以慳返$5。彈餅好有驚喜，一啲都唔油膩，好似一滴油都冇，個皮有d似烙餅，所以有少少焦香，裏面仲有芝士同埋粟米，當然有拉絲嘅效果。呢個非常好食，但我覺得唔算台式。珍珠奶茶普通，有勁多珍珠但係好淋，茶底正常但唔係特別濃。夜晚九點就閂門，要食就早啲去排隊。