御石燒 (Closed)

今日行過廣華街覓食，發現有間新餐廳貼住試業中，原來係食日式燒肉，仲要係用石頭燒同埋有吉列牛！！身為食肉獸既我，當然要試一試。餐廳裝潢走木系 x 工業風，水泥色既牆身掛左好多日式藝術畫，座位寬敞，感覺新潮又幾舒適。店員介紹除咗石燒牛肉之外，仲有石燒豚肉同埋不同丼飯及定食。御燒極上黑松露吉列牛肉上枱個陣見到牛肉黑黑地，以為唔新鮮，點知原來係牛肉塗滿黑松露，外層用麵包糠炸過，用料好足！首先用牛脂肪抹係燒熱左既石板上面，牛肉放咗上去之後，油脂滋滋作響的聲音，太治癒了。一口放入嘴裡，淡淡的黑松露味道混合著牛肉的油脂味，加上鮮嫩的口感，超級滿足。御燒特級牛小排 牛小排的油脂分布得好平均，咬落去唔會柴口，比起吉列牛，更加可以食到牛肉嘅原味。石板好玩之處就係可以控制幾成熟，燒到牛肉兩面變色之後就可以食。牛小排用料新鮮，有牛肉奶香味，好有驚喜，再沾上特製醬汁之後，送飯一流😚飲品方面，餐廳以罐裝飲品為主，有我鍾意飲嘅OHHA，燒肉配零卡汽水，絕配。