志光麵檔 (Closed)

聽講志光麵檔新出咗個串燒雞蛋仔，幾吸引，今日特登由旺角走過去幫襯。最想食嘅蕃薯味賣哂😭，於是叫咗個肉鬆味。雞蛋仔一串三粒，粒粒都好大，用支竹籤串起，好得意。一咬落去，外皮好脆，入面都算實心，紫菜肉鬆味道較濃，同雞蛋仔嘅甜味都幾配合，唔錯。趁熱食完雞蛋仔，再嚟多碗藥膳花雕醉雞卷米。醉雞卷有六件，件件都啖啖肉，以 $48 嚟講，認真抵食。雞卷嘅酒味雖然唔算濃但好入味，加上肉質嫩滑，整體嚟講係幾好食。至於米粉個湯底就比想像中淡，如果可以甜少少就更好。