平日下午去到，店舖一個人都無，門口又見唔到炭爐，仲以為自己去錯地方，後尾老闆行出黎招呼，仲介紹左幾道拿手串燒，就知無去錯地方。炭爐係店面入口，用玻璃圍住，所以可以見到老闆處理過程，的確係用炭起火，再用大葵扇控制火力，見住食物由生燒到熟，連行過的街坊都忍唔住停低睇。
個人推薦：白鱔，入口又爽口又彈牙，肉質鮮甜夠結實，加少少醬汁就已經可以令鱔的鮮味完全發揮；秋葵，外爽內軟，燒完之後黏黏的口感變得容易接受；白蘑菇，菌香味非常濃郁，睇落好似好乾身，但食落居然有汁；雞腎，好爽脆的口感，唔會燒到太老咬唔開；近江牛粒，每粒的火候都控制得好，中心位置仍帶有少少粉紅色，入口有肉汁不鞋口，肉味都算濃郁；咖哩魷魚翼，本身已經好脆口，再加埋個咖哩汁包裹，令味道層次大大提升。
