炊豕店 (曉悅) (Closed)

今日同朋友行街，行到肚餓想簡簡單單食個晚飯。見到門口寫住“我們都是食豬大的”，覺得好得意，咁我哋就行咗入去啦。呢度環境裝修簡約，木枱木櫈，畀人感覺舒服整齊。餐牌亦好簡單，一頁睇晒，乾淨俐落，唔花巧，門口都講到明，呢度當然全部都係豬啦。我叫左個蔥油豬扒飯，真係勁大碗。豬扒又多又大塊，咬落軟熟，調味都ok，唔會太鹹。蔥油好香，鹹鹹地，食到滿口油香。呢度啲飯係用珍珠米，黏口得嚟又唔會太爛。朋友就叫左個秘製豬扒咖哩汁，飯就轉咗粗麵，另外再加咗塊厚午餐肉。佢話個麵好多，呢個係撈麵，麵爽口彈牙，用咗蠔油做醬汁，食起上嚟好入味。再加埋個咖哩汁一齊撈，就更加惹味。午餐肉好厚，咬落有口質，夠晒味道。呢度嘅飲品係罐裝汽水，或者係果汁，豆漿，仲有熱飲。朋友就嗌咗罐coke zero，我就嗌左蘋果汁。呢隻蘋果汁都幾飲喎，唔會太甜。