個仔終於開學喇，要好好食一餐，但又唔想去到咁遠，就搵咗喺大埔區嘅日式放題 - 滿屋日本料理。我就揀咗A餐，見佢有72種食品選擇都已經好夠。佢有任食甜品、飲品同雪糕，而種類都係有好多選擇，仲要唔係平價嘅雪糕喎😍
一嚟梗係要食刺身先啦😆刺身幾新鮮又夠厚，食落去唔有浸冷藏嘅味道，魚類嘅刺身唔會食到有根👍甜蝦仲要有膏🥰
壽司都係水準之上，滿屋嘅灸燒做得好好，我最推介嘅係炙燒左口魚壽司，灸燒得好平均，令左口魚嘅油迫晒出嚟，一食落口有種入口即溶嘅感覺 😋
一間日式放題，要做到刺身、壽司同熟食都保持係同一個高水準真係唔容易 。佢係我第一間喺熟食方面覺得有驚喜嘅放題。佢嘅串燒火候控制得唔錯，佢燒嘅牛舌一咬就可以咬得開 ，雞軟骨燒到卜卜脆，但又唔會硬 。
佢個牛肉鍋嘅牛煮得啱啱好，唔會韌，窩入邊嘅配料全部都好入味 。
個炒蜆同辣酒花螺真係要讚一讚，竟然可以有呢個大排檔嘅味道，啲汁嘅配搭同濃度剛好，材料夠新鮮又夠火候。
呢間放題，食物嘅質素喺以上我都提及了，仲有兩樣嘢係最欣賞，第一係食物嘅份量：唔會話因為佢放題會整到大大份俾你，令到你快啲食飽，而係剛剛好，令到客人可以嘗試唔同嘅食物種類 。第二就係員工嘅服務態度係非常之好，縱使我去嗰日佢哋唔係好夠人手，但仍然都會笑臉迎人同態度保持得好好，客人有食完嘅空碟好快就會過嚟收拾，而且每一次都會好有禮貌地徵求客人嘅同意才收起，令客人嘅餐廳體驗大大提升 👍👍🫶
