舖面唔係大，中間有個大型水吧。
嘢食啱年輕人口味多啲，老人家未必啱食，場內都唔見有老人家。我哋都算係年輕人，嘢食都幾啱我同朋友口味。
【綠茶鮮奶$36】
因為俾餐牌幅相吸引，所以我哋兩個都叫左呢個。構圖好可愛，有少少似三眼仔，一上枱未飲就要相機飲先，喪影相！！！綠茶味同奶味都好濃好平衡，唔駛加糖，甜度啱啱好！
1
【軟殼蟹黑松露忌廉意粉$108】
呢個係我近年食過最好食嘅軟殼蟹，上枱時好香炸蟹味。擺得好有氣勢，外皮鬆脆，難得裏面有唔少蟹肉，夠飽滿、脹卜卜（近年食好多都係主要得個殼，入面冇乜肉，好奇怪）。意粉煮得煙韌，醬汁creamy，面頭亦有好多黑松露，滿晒黑色點點。呢道菜會係我翻食首選！
【手作特級和牛漢堡$98】
點餐時店員問駛唔駛開半，又幾貼心，我成日都切得好肉酸！芝士半溶，漢堡扒亦幾厚，味道係唔錯，但係就食唔出牛味特別濃郁或者油脂特別豐富。
【紫薯窩夫$82】
好少見到窩夫配紫薯，即刻要點一客！面頭有一粒粒小蕃薯同士多啤梨，窩夫呈心型狀，夠脆但冇乜蛋香。雪糕得一球，唔多夠蘸窩夫，其他口味有兩球雪糕會好啲！
做左呢個有九折，即係唔駛加一!
埋單後仲有coupon送返下次用，仲可以抽獎。
亦都有吸印仔換食品。
睇返午餐都係$68-78，下午茶$35-45，仲包餐飲，確係幾抵咁。下次自己一個人都可以嚟呢度食個tea或lunch，行遠少少，唔駛成日喺太和商場食啦，食到悶了！
2
