100米台式餐廳 (Closed)

大元街市平台美食廣場重開了，之前美食廣場關閉了一段時間，最近路經發現終於有新食肆開張！今次見到有兩間食肆同時試業，連招牌都用紅紙遮蓋未除，左台灣、右韓國，兩間鋪頭面積都唔係好大，大概只有40個座位，今次小弟先試一試台灣美食.....一坐低樓面伙計就介紹午市套餐，望一望餐牌都幾多選擇。今日口淡淡，一於辣一辣個口先，叫咗一個麻辣口水滑滑雞套餐配肉燥飯，開頭諗住四十零蚊個套餐，碟頭都唔會多得去邊！但當食物上枱時，真係嚇咗一跳，肉燥飯係湯碗上，仲有半隻滷水蛋加小棠菜，剩係碗飯外面都賣緊2x幾蚊，食落肉燥有小小偏鹹，好在同白飯又可以配合倒喎！可能正宗台灣菜比較重口味，但滷水蛋嘅味道就啱啱好，有滷水味之餘又唔會太鹹，口水雞嘅份量都唔小，差唔多有四分一隻雞，咁嘅價錢，大家都知道係冰鮮雞，但食落啲肉又冇霉，台式麻辣同川式麻辣嘅分別係冇咁辣同麻，唔會食到變孖潤腸同冇晒感覺。個餐仲有餐茶跟，如果加錢仲可以試埋台式特飲添！