Video
Read full review
2023-04-27
1926 views
第一次上嚟寫食評，實在太嬲我地一行人7位 book左730pm，朋友們遲到，一坐低無耐就嗌左個椒鹽九肚魚先。陸續差唔多7點9至8點就嗌埋其他野食。首先唔知點解(應該係)老細長時間黑口黑面，未夠8點嗌荷葉花甲話冇，都唔緊要嘅但講完一句冇又行開左，完全一副唔想等你諗嘅模樣。一行人我地有人飲酒有人唔飲，但最後我地都話要青島同黑啤各一，佢問我地幾多人飲，我話5個，但佢嚟7個碗。酒碗就嚟多左兩個，一開始嚟啲餐具得5隻匙羹，同佢講唔該俾多兩隻我地，最後就完全冇見過嗰兩隻唔知喺邊嘅匙羹。跟住好啦，嚟到明明我地只係嗌各一，佢地嚟左各二。我地只係開左各一嚟飲，但佢地員工會自己行嚟幫你再開，我地成頭問號，但有朋友外國返嚟，佢地開心就算。我地2個唔飲酒嘅朋友想嗌無酒精飲品，戴眼鏡個叔叔員工仲一副「飲酒啦」唔想我地嗌茶/汽水嘅態度，非常不明所以。後尾佢地又自動波嚟多兩支啤酒，但其實我地真係唔飲，佢亦冇問過我地飲唔飲。淨係係咁好似表演式咁用筷子開酒，屈我地飲咁。最過份係明明其中一個朋友喺佢開左之後揚言話唔飲，老細仲懶幽默咁(?)一野倒落佢個碗倒到滿哂。明酒水嘅油水係最高嘅，但生意都唔係咁做？感覺非常唔老實同埋真
我地一行人7位 book左730pm，朋友們遲到，一坐低無耐就嗌左個椒鹽九肚魚先。陸續差唔多7點9至8點就嗌埋其他野食。首先唔知點解(應該係)老細長時間黑口黑面，未夠8點嗌荷葉花甲話冇，都唔緊要嘅但講完一句冇又行開左，完全一副唔想等你諗嘅模樣。
一行人我地有人飲酒有人唔飲，但最後我地都話要青島同黑啤各一，佢問我地幾多人飲，我話5個，但佢嚟7個碗。酒碗就嚟多左兩個，一開始嚟啲餐具得5隻匙羹，同佢講唔該俾多兩隻我地，最後就完全冇見過嗰兩隻唔知喺邊嘅匙羹。跟住好啦，嚟到明明我地只係嗌各一，佢地嚟左各二。我地只係開左各一嚟飲，但佢地員工會自己行嚟幫你再開，我地成頭問號，但有朋友外國返嚟，佢地開心就算。我地2個唔飲酒嘅朋友想嗌無酒精飲品，戴眼鏡個叔叔員工仲一副「飲酒啦」唔想我地嗌茶/汽水嘅態度，非常不明所以。後尾佢地又自動波嚟多兩支啤酒，但其實我地真係唔飲，佢亦冇問過我地飲唔飲。淨係係咁好似表演式咁用筷子開酒，屈我地飲咁。最過份係明明其中一個朋友喺佢開左之後揚言話唔飲，老細仲懶幽默咁(?)一野倒落佢個碗倒到滿哂。
明酒水嘅油水係最高嘅，但生意都唔係咁做？感覺非常唔老實同埋真係好唔尊重。
野食上得都真係幾慢，好少食大排檔上菜咁慢，記得745左右嗌嘅生菜煲係830先上。嚟到都係經典，其實味道唔難食，ok嘅。但我覺得有啲奇怪，我第一次食生菜煲係得生菜頭(見下圖)，成煲都係冇葉嘅，我唔知係咪我見識少，但我食高級粵菜館食生菜都有葉食？再見到佢menu有生菜包，想知啲葉係咪留左去生菜包 (但我地冇叫)
食食下中間佢有sell過我地話帶子抵食$68個，我地諗左literally 1-2分鐘同佢講好啦要7隻，佢話冇哂。okay，佢話有蟶子$98隻。好啊我地要7隻。跟住上左第一輪蒜蓉粉絲蒸，一開始見到大家都拎電話影下啦，望落都唔錯，但食落就覺得，咦？乜原來咁細隻。(後悔冇影多幾張相) 喺啲蒜蓉下面係同我所認知嘅「大蟶子」1/3 至1/2 size左右。有啲散同細條。
然後過左我諗3個字左右佢又上多左碟蟶子，我地呆一呆「我地冇嗌喎」。老細話「頭先係3.5條蟶子蒸，呢度係豉椒炒3.5條。」我實在係大開眼界，生活香港飲飲食食廿餘就三十年，我第一次食大排檔叫人頭蟶子佢會幫你分開一半再扮做人頭份量咁蒸，再用一半去炒。重點係咩？佢從來冇問過我地要點整，亦冇同我地講過呢個咁特別嘅處理。成件事同我地預計嘅完全唔一樣。我心入面係有質疑咁其實你同蟶子仔扮係7條蟶子皇都得？利申食落都係完全唔厚肉，豉椒炒嗰碟直程係細條到好難搵同啲薑蔥係會撈亂。
另外，我地本身想嗌黃酒雞煲，老細推介我地醉雞煲話好食好多，咁就好啦照叫。老實講味道是還好啲，有朋友覺得太重酒味，我自己就鍾意嘅，佢係拎個煲出嚟喺你面前落紹興酒同玫瑰露酒煮嘅。食到最後我地其實已經好飽，之後佢拎左兜飯出嚟話煮埋個飯，我地有朋友問話「個飯係..…？包埋？」佢話「用個湯煮埋個飯」咁我地以為係包埋咁好啦。最後係淨左大半兜食唔哂因為真係好飽。但睇返最後張單，個兜飯+蛋原來係另外收$128。
成餐飯，唯一佢唔屈我地仲主動見我地好飽又冇郁碟咕嚕肉，話不如收走佢由佢唔緊要。
到埋單，我特登有望返張單，佢「咕嚕肉減左，酒刪左一支有支未開」
我唔理解點解酒咁計法：「點解係5支？一開始都係4支」(都未講明明一開始我地只係嗌各一)
老細：「我地計你地開左幾支」
我：「我地?我地冇叫你開, 你開左我地都冇飲過」
老細：「....(靜) 咁姐係減左支啊嘛?」
佢冇同我再拗我都唔想拗，嗰度又嘈又逼，我地食完，外國朋友開心我地就想快啲走算。最後張單我努力trace返鬼畫符邊樣打邊樣：
不過啱啱我用計數機撳過，啤酒$58支，一支解茶$25，一罐汽水$15。跟足佢寫嘅價，加埋一(雖然我唔係好知俾人黑左成晚面，再加唔問你就幫你開酒係咩服務)，都係$2349.6。
埋單每位300幾，但個人覺得無論食物質素、環境、份量、服務，整個體驗，都唔值呢個價。
我嬲到講真真係冇可能有下次，絕對唔會再去，請我都唔會去。開啲歌大聲到我要擘大喉嚨同對面講野，嘈得嚟又唔係傳統大排檔feel， 大排檔都闊落過佢。冇服務可言，老細同員工我都感覺好似得罪左佢地咁被黑面，成晚以為自己係遊客，係咁有不明嘅側側膊，搏你唔嘈佢就照收錢嘅待遇。呢鋪真係開心香港，喺香港都有好似去左旅行嘅感覺，用遊客價食普通野，呢個咪傳說中嘅俾錢買難受？
Post
