咖啡韓食 (Closed)

作為街坊，平時行經過都見到呢間係好少人，之前都覺得佢有啲慘，以為真係疫情搞到咁，但原來真係大伏。wfh快快手近近地終於食第一次，兩個人叫咗牛肉石頭鍋飯，同埋豆腐海鮮辣湯麵。其實石頭鍋飯真係好易整，係有少少工序，就係將啲嘢切晒佢，逐樣菜用麻油調味料炒炒佢，但係佢啲菜(冬菇，豆芽，菠菜)一係用水烚，一係沙律咁樣生落(紅蘿蔔)，牛肉得三大件鞋口到吞唔落。成碗飯嘅調味料就係靠韓國辣椒醬。大佬呀，咁樣我喺屋企自己整都得啦，專登落嚟食頹食，連埋嘢飲成為$61。豆腐海鮮辣湯麵，公道說話佢都有啲蝦，青口同埋蜆，咁我都冇預過佢嘅味道會似正宗韓國食到嘅海鮮辣麵咁，但係佢浸味仲差過自己係屋企煮辛辣麵，凄凄慘慘戚戚，冇嘢飲都要$56。因為為咗健康，依家一日得一餐係正常主餐，為咗呢啲咁嘅嘢食，浪費我一日嘅quota，講真真係好嬲。誠心建議外面風大雨大，老闆留返兩個錢宅袋。