Tea既時間一大2細食lunch，本來都以為只可以叫飯食或者小食，入到去發現原來有火鍋食，仲要係一人鍋，真係岩晒我自己自私食。點知俾大果個見到有蟹鍋，佢鐘意食貝殼類，咁做大就讓下佢，叫左個蟹將軍俾佢，細果個就叫左個兒童餐，我就叫左韓式小食拼盤，覺得大果個未必食得晒一個火鍋。點知睇少左一個發育中既小朋友胃口，最後我要叫多個韓國牛肉拌飯先夠飽🤣🤣
點解我咁講？因為蟹將軍入邊係有粉絲跟（仲可以選擇烏冬），仲有魚片，特長皇帝蟹柳同菜，正常應該夠食，但係今次因為佢鐘意我仲加多份蜆同肥牛俾佢食，都食晒，以後食物都係要預多小小先夠。
唔好以為蟹仔細細就冇肉食，其實都有，D肉同蜆仲好鮮甜好好味。皇帝蟹柳又大又長，啖啖肉，仲俾左細果個食，食到想再添，而我就食左入邊跟埋既蟹膏醬，加埋入粉絲食，真係好正，成個層次升晒。
細果個既兒童餐就好大份，有牛肉壽司、魚餅、超巨型豬肉粉絲餃，同埋小朋友最愛既香噴噴薯條，細細就一定食唔哂，唯有叫大果個幫手食，薯條熱辣辣，應該係即炸，夠晒新鮮滾熱辣。
韓式小食拼盤，就係紫菜粉絲卷、豬肉粉絲餃同泡菜粉絲餃，三款小食種都外脆內軟，好岩小朋友食，而我就比較鐘意泡菜味餃，因為口味比重，濃。
最後牛肉拌飯加大量 辣椒醬先夠地道，入邊餸既份量都多，估唔到我地三個咁餓食到咁多野食，大果個已經諗定下次黎食邊個鍋喇。
