吉利餐室 (Closed)

上環一帶集中咗好多寫字樓，到了午市時間， 餐廳都必定坐無虛席。呢一間位於西港城後面東來里嘅外賣店《吉利餐室》，食正打工仔「平、靚、正」心態， 推出左幾款50蚊有找嘅午餐飯盒。比較多人叫嘅有泰式雞飯， 同埋金牌午餐。 兩者包埋野飲都只係45蚊，今時今日都算係超值。泰式雞飯跟油飯，仲連個老火雞湯。老火湯有冬瓜降火，帶有少少白胡椒味，唔太咸。海南雞幾滑，又可以揀雞胸雞脾，最啱鐘意啖啖肉朋友。點埋秘製甜豉油，一流。油飯粒粒分明，夠晒香。另外金牌午餐，可選2餸，揀咗豬排，同蓮藕餅。藕餅用料豐富，食出粒粒爽口藕粒，好有口感。加上半熟荷包蛋餸飯好味。跟餐嘅蜜糖水甜道啱啱好，夠滋潤。100蚊，2盒飯連飲品，d餸又多，真心抵食。