老夫子餐館 (Closed)

比屋企人叫落黎老夫子餐廳都攞位先，點知黎到超多人等，咁不如轉外賣啦。外賣大概等左十五就有得攞，原來而加轉左個咁得意嘅外賣袋。另一邊係大蕃薯，旁邊仲有其他圖案，幾用心喎作為一間主題餐廳。一家四口叫左四樣野，各有各人口味，老夫子餐廳都真係幾多選擇，總有一款啱口味。叫左粟米焗煙鴨胸螺絲粉，熱辣辣大大盒。好多粟米，煙鴨胸都有好多片，螺絲粉有咬口，最正係面層有一大片芝士，好味呀。另一樣係香草野菌忌廉天使麵，打開盒好香香草味。醬汁沉左係底，拌勻後食幾正，每一條粉都有忌廉汁黏住，雜菌都落得幾多，加少少辣椒汁勁正。仲有係惹味咖哩牛筋腩飯，咖哩汁同飯分開上，唔怕啲飯淋晒。咖哩汁微辣香口，入面有好幾件牛腩同牛筋，仲有幾舊薯仔，已經炆得好淋好入味，而且勁多汁好好撈飯。最後仲有蜜桃焗豬扒飯，同樣係即刻焗起勁熱，呢盒好大盒好重喎。豬扒厚切大大塊，都幾淋唔會黐牙，飯炒底好香口，有幾塊蜜桃好甜美，醬汁都好味，正。外賣仲有折添，幾抵食吖。