春禧堂台灣料理餐廳 (Moved) New Location

好耐冇去中港城，嗰度比我嘅印象除咗喺度返工嘅人流和坐船去大陸和澳門嘅旅客，就唔多遊人和食肆。上星期六晚居然比我喺二座平台找到有幾間新開食肆，睇落唔錯咁，其中一間係食台灣料理嘅餐廳，正在試業中。那裏地方寛敞，座位舒適，柔和粉綠色座椅感覺好young, 更用QR code自助點菜，走年青人路線，感覺輕鬆自在。食台灣嘢當然要食番啲地道食品，於是我哋分別叫咗三寶（牛筋、牛腩和牛肚）紅燒牛肉麵和台式紅燒五寶（滷水牛展、牛筋、牛腩、雞翼和豆腐）大拼盤配滷肉飯。食物一上枱就被嚇親，份量勁多，三寶麵大大碗，除咗有三寶外，還有小棠菜、紅蘿蔔和白蘿蔔等蔬菜，還附有三款涼菜。而個紅燒五寶滷肉飯更加嚇人，每樣食材均有三大件，一人晚餐份量其實足夠兩人食有餘，真係大件夾抵食！滷水汁調教得宜，不會偏鹹或過淡。牛展、牛筋和牛腩炆煮得非常軟淋而且入味，尤以牛筋最正，淋得嚟有糊口感覺，骨膠原豐富。滷水豆腐索晒啲滷水汁好滋味，雞翼也不錯。麻辣紅油水餃微辣開胃，每隻都脹卜卜，$28四隻都幾抵食。珍珠奶茶粒粒珍珠煙靭有咬口。台灣啤酒冰凍透心涼。