Video
Read full review
2021-07-29
4671 views
京川滬既餐廳小編都好多機會會品嚐到，但正宗既東北菜相信除左北京填鴨外，好多時都會混離部分既廣東菜咁一齊食；今晚小編終於可以品嚐到老掌櫃既正宗東北菜。位置上雖然相對唔就腳，但其實響奧運站行過黎只需10分鐘。小編就先建議大家響Openrice訂位，否則過左7點後門口就會排哂隊，話就話響商場，但由於係地鋪關係，門口排隊區都係要熱住等，所以都係早點訂枱吧。睇過其他朋友介紹店鋪內係比較擠迫，坦白講又真係既，所以如果兩個人食飯都要預左同其他人可能響膊頭上有接觸。講返正題先，老掌櫃最令人津津樂道既，就係佢地既菜式全部都係大份，而價錢上又唔係真係太貴。因為小編一行5人既關係，今次就可以盡情咁試多少少佢地既菜式了。1) 雞絲粉皮 ($62)：好味! 芝麻醬睇落去好少，但其實非常之濃，所以就算將粉皮完全攪拌後芝麻香都仍然好強，不過青瓜絲同雞絲既比例就好似唔太平衡喇。2) 四喜烤麩 ($62)：還好! 麥麩份量非常多，味道都幾濃!3) 蔥燒木耳 ($62)：好味! 原本叫錯既菜式 - 但原來炒香既木耳，不單止保持住木耳個種脆口，而且炒香既味道送飯都唔錯。4) 東北肉皮凍 ($58)：特別! 當大家可能覺得豬
位置上雖然相對唔就腳，但其實響奧運站行過黎只需10分鐘。小編就先建議大家響Openrice訂位，否則過左7點後門口就會排哂隊，話就話響商場，但由於係地鋪關係，門口排隊區都係要熱住等，所以都係早點訂枱吧。
睇過其他朋友介紹店鋪內係比較擠迫，坦白講又真係既，所以如果兩個人食飯都要預左同其他人可能響膊頭上有接觸。
講返正題先，老掌櫃最令人津津樂道既，就係佢地既菜式全部都係大份，而價錢上又唔係真係太貴。因為小編一行5人既關係，今次就可以盡情咁試多少少佢地既菜式了。1) 雞絲粉皮 ($62)：好味! 芝麻醬睇落去好少，但其實非常之濃，所以就算將粉皮完全攪拌後芝麻香都仍然好強，不過青瓜絲同雞絲既比例就好似唔太平衡喇。
2) 四喜烤麩 ($62)：還好! 麥麩份量非常多，味道都幾濃!
3) 蔥燒木耳 ($62)：好味! 原本叫錯既菜式 - 但原來炒香既木耳，不單止保持住木耳個種脆口，而且炒香既味道送飯都唔錯。
4) 東北肉皮凍 ($58)：特別! 當大家可能覺得豬皮製既肉皮凍又肥又油膩既話就錯了。肉皮凍有少少類似皮蛋既口感，即係啫喱狀既肉汁去雪凍而成，食落去完全無肥膏既味道。
5) 紅油抄手 ($48)：好味! 每粒抄手既形式好似雲吞咁大粒，配合偏向麻辣味既辣汁，完全令你既食慾會提升。但因為抄手既尺寸關係，最好咬開1半後再落多少少醬汁食會更好。
6) 北京填鴨 (半隻, $168)：值得推薦! 大家食開既北京填鴨，好多時都會因為師傅刀功太好而令皮與肉既比例係9:1 (即係片皮鴨)；但老掌櫃既北京填鴨，皮與肉既比例就去到1:9，亦即係話大家食個陣係啖啖肉! 半隻 (2-4人用)有12件1:9既切片，另外仲有幾件7:3偏向皮多既切片，以及1份蔥醬及12件包皮。淨係睇到咁大碟既填鴨就已經值回票價啦! 鴨皮燒得幾脆，而鴨肉完全唔覺有過火而燶既感覺，肉味都唔錯!
7) 砂窩雲吞雞 (半隻, $138)：好味! 好味在於雞湯味都幾濃，而雲吞就大約有6粒，加上半隻雞，再配合娃娃菜加白菜仔而成。但半隻雞唔似好多鋪頭會長期浸住而令雞身變軟咁食，反而老掌櫃既雞一夾出黎仲係結實而似剛剛落煲既雞，呢點就令小編有點失望。
8) 松鼠魚 ($88)：好味! 利用龍脷柳去製作既魚，好處係魚質會滑好多，再配合酸甜既醬汁都會令人響食填鴨過程有油膩感個陣可以解解佢。
9) 東北農家炒飯 ($68)：還好。農家炒飯用上三色豆﹑蝦仁同肉碎去製作，味道上會比楊州炒飯重口味，不過小編就覺得炒飯既飯粒比較稔，如果乾身少少會好點。
食完正餐後，趁個甜品胃仲未俾正餐胃去滿足去蓋過哂，就決定再叫少少甜品試下先!10) 豆沙鍋餅 ($48)：好味! 與平時既長方形鍋餅唔同，老掌櫃係用上圓形既餅底，然後響唔太燶既情況下去煎熟，味道會比平時既鍋餅無咁香而帶出更多既紅豆味。
11) 拔絲地瓜 ($68)：推薦! 一開頭小編誤會係已經拔絲既狀態上枱，但當見到店員準備定一盤冷水既時候，就知道原來係由自己調校想拔絲既程度及款式。地瓜煮得非常熱，所以當你由糖漿入面夾起地瓜個陣，部分既糖漿就已經被黏起而形成拔絲效果，再放入水中解溫就令糖漿凝固，絕對適合有創意既朋友!
綜觀黎講，11款菜式都係因為小編一行人比較大食而叫到咁多，以呢度既份量黎講小編覺得6-7個人食都仲得，以晚飯人均消費百幾蚊，再考慮北京填鴨既質素，都幾值得推薦俾大家去試試吧!
Other Info. :
店員出菜既效率非常高，基本上小編叫左甜品以外既9個菜式都會響5-8分鐘內到達。如果大家叫得多既話就請你努力同專心清哂枱上既食物先喇!
(北京填鴨如果食頭輪既晚飯就唔一定要預留，但如果係食次輪既晚飯既話，建議24小時前預先留定。)
(The above review is the personal opinion of a user which does not represent OpenRice's point of view.)
Post
