本地薑 (Closed)

喱間茶記已經係我同 P san 第二次幫襯了。 入到店, 指定動作之後, 店入面唔多人, 店員無指定我哋一定要坐邊喥, 所以我哋隨便搵個四座位坐低, 方便放埋我哋啲行裝。我哋點咗一個二人餐, 揀咗西檸雞同魚湯浸娃娃菜, 飯方面除咗白飯之外, 仲可以揀湯米粉, 好啱我口味, 飲品方面, 我同 P san 都點咗凍檸茶。凍檸茶有茶味, 而且檸檬新鮮, 甜度亦適中。   西檸雞方面, 同一般茶餐廳比, 賣相唔錯; 口感方面, 肉爽而且有雞味, 雖然有個芡汁包住每件雞件, 外皮仍然酥脆可口, 而且炸漿薄, 食落唔會油淋淋; 加埋個西檸汁酸甜酸甜, 好醒胃同埋清爽而不膩。  魚湯浸娃娃菜, 喱個有少少驚喜, 魚湯入面有大量薑絲, 估計應該係店家為咗闢腥而加落去嘅, 令個魚湯有魚味之外, 再增潻咗薑嘅清幽味再加點點辣味, 但又唔會辣到好辛苦, 令個湯好順喉, 飲完個身仲有少少暖暖哋, 喱個餸除咗有魚湯、薑味同爽甜娃娃菜之外, 仲有健康木耳增加菜餚嘅口感。而我叫嘅湯米粉, 個湯無咩特別, 係清雞湯, 唔似其他茶記的味精湯咁濃咁咸; 而個米粉係爽口而且有少少米味, 好香。 P san 個飯係我哋鐘意食