聖安娜餅屋 (Closed)

前日(27-12-3016 Sun），同老公買完餸，心思思想以會員價$168.00買原價$208.00嘅抹茶巨蛋食，老公話好，行去睇睇，佢見個size唔算好大個， 啱我，爸爸同我老公三個人食。咁就買啦。返到屋企度吓佢size先，高有8厘米，直徑有12厘米。到夜晚食完晚飯就拎出嚟食，切開佢時，最外層嘅抹茶脆皮即刻裂開，內裡每層唔同口感嘅蛋糕層都好清晰分明。分好開動喇，感覺成個唔係好甜，食到抹茶嘅甘苦，味道亦唔係太濃，脆皮唔會好似食牛奶公司脆皮雪條o個層朱古力脆皮咁熔，即使食咗入口都唔會。而內裡嘅蛋糕軟綿綿，mousse口感正常，白色嗰層食到牛奶味，但睇佢網頁介紹，話係蜜糖mousse，完全唔係嗰回事，不過咁都好，冇咁甜；而最頂嗰層寒天有啲似涼粉但腍啲;黑糖啫喱味道唔太難食，我哋食完都唔覺好膩。服務：好好，好有禮貌，會問要唔要生日牌，生日燭 。其他:我將個蛋糕拎到返屋企後，睇到個蛋糕原來印ｏ左呼籲環保ｏ既訊息，原來佢ｏ地將個盒印ｏ左６個正方形同６隻叉，客人只須撕出ｏ黎，就可以當叉同碟用，碟就冇問題，但叉…因為紙盒有油墨，油墨會掂到蛋糕然後食落肚，咁就唔係幾好。建議做叉ｏ個位唔好印顏色。