拉麵店價位都差唔多，所以每間都有自己特色，先可以突圍而出。金田家分店唔多，舖頭都幾細，只有吧枱同二人枱，但空間用得唔錯。
譬如枱嘅櫃位可以放袋，同日本舖頭一樣貼心。
今次揀咗比較特別嘅柚子辛口拉麵。
九州拉麵沿用豚骨湯、直身麵，芽菜比較多。呢度麵可以揀軟至極硬，聽聞係九州拉麵店嘅一貫做法。我揀咗軟，食落冇話特別稔，不過就幾掛到湯。
個人都係比較鐘情曲麵嘅蛋香，但呢啲係地方特色，要尊重返。
湯底未撈辣醬已經有微酸。
呢度豬骨湯偏啡，飲落有豬肉香，味道好濃。
撈好辣醬湯底變成橙紅，辣辣地，聞落好似擔擔麵。
柚子香味淡淡地，要慢慢食出嚟，柚子部分唔算發揮得超好。
豬肩肉切成薄片，醃得入味。
冇諗到薄薄一片都食得出油脂香，唔錯。
金田家小食種類唔多。我就叫咗拉麵店比較少見嘅男爵薯餅，亦即係可樂餅。
男爵薯比較軟身，製成薯餅口感綿密。
一客就有牛肉薯餅同紫薯甘栗兩隻口味，幾啱獨食嘅我。炸皮麵包糠好薄好碎，炸起嚟鬆脆輕盈。
紫薯比較甜，入面仲有大粒栗子，食得好滿足。大推呢款小食呀！！！
追加嘅溏心蛋亦冇令我失望。醃得相當入味，蛋黃香濃、軟糯，蛋白熟透而滑溜。
食得少菜，所以追加埋木耳。
poly學生仲有折添，而咩時段去價錢都一樣，只係座位較少，lunch hour就要行快步喇。
