12號晚都係唔份氣再去搵多次,搵之前重特登打去訂位,叫佢地留有獨立電視ge卡位俾我地,今次好好彩,俾我地搵到,原來大早已經過,只係日頭見唔到佢o既閃登招牌je~一入到去,格局一d都唔似一般打邊爐ge地方,全部都係梳化位,好舒服(我地座o個張更加唔使講la,有獨立電視)如果想座有獨立電視ge卡位,記得先訂檯(訂檯先問門有冇),因為唔係張張都有獨立電視ga!
座位就幾舒適la,至於食物方面,佢係半畫紙仔,半自助ge,點解咁講?因為佢d丸丸、菜類、魷魚都係放曬o係出面ge開方式雪櫃度,我重特登出去feel過,個雪櫃唔會唔夠凍,食物又多款又好新鮮tim~至於畫紙仔方面,都係d大路野....魚、肉同雲吞之類,都係o個句,食物新鮮,我本人覺得雲吞、魚皮餃同雞柳好好食,雲吞、魚皮餃唔係皮多過餡,平時我唔多食魚皮餃,佢呢度ge真係幾正!
至於飲品方面,係要另外加錢ge(除左茶同水之外),12蚊3支,又或者可以叫一渣渣ge飲品,都係18蚊左右...另外佢重有杯裝甜品如布丁、桂花糕咁,都係8-10蚊,整體黎講68蚊一位(加一&8蚊茶介),佢d食物ge質數都算幾好。
唯一有度唔好ge就係d侍應,你問佢野個個都一臉茫然咁,我地叫左芒果布丁,餐牌明明寫住8蚊一杯,落單時冇講,拎到埋黎都冇講,到我開左食左一口阿姐就講:杯布丁加左價,而家唔係8蚊,係10蚊....我唔係2蚊都要計較,只係加左價你係咪應該改餐牌?係咪應該要一早出聲?而唔係等我放左入口先講je?重有佢寫住18蚊一碟日本製手打烏冬,我地問阿姐大約有幾大碟(係怕太大碟食唔曬)佢依然係一臉茫然咁話一份有3包咁lo,我地話3包??係咪即係街市賣10蚊3包o個種呀?o個種我地唔要la...佢都依然係一臉茫然咁冇答我地行開左,我地有d懷疑,於是再問另一個侍應(哥仔)手打烏冬大約有幾大碟呀?佢居然又答我地一碟有2包咁lo...佢重好好心咁拎左隻碟(係隻碟)俾我地睇大約有幾大份,最後我地都係叫左一份黎試到底係何方神聖,好在食落係真係有唔同,好明顯唔係街市10蚊3包o個種,呢隻好食好多.....
o個日我地4條友去食,連埋另加ge飲品、甜品同烏冬,埋單400幾蚊,如果唔使加錢叫其他野,佢都幾平ga,係可惜冇飲品lo~
