NUTTEA (旺角中心第一座) (Closed)

Nuttea即係堅果奶茶，冇用牛奶冇加奶精嘅健康飲品。佢哋主打嘅係堅果奶蓋，用咗五隻堅果去整，係素食者嘅選擇。雖然我唔係素食者，但係呢個特別嘅概念吸引到我去試。我本身都鍾意飲牛奶嘅，到底用堅果整嘅「奶」蓋會唔會遜色咗啲呢？今日經過就試吓先！原來呢度仲可以成杯奶蓋買返去，自己加係茶/咖啡上面飲！呢間仲要係黃店，呢層都有好多黃店，好多擺設都好有心。我叫咗呢個招牌飲品：伯爵朱古力堅果奶蓋茶（$46，凍、無糖、少冰）。奶蓋好杰身、質感軟滑，份量亦都好多，用個奶蓋鏟撩上嚟食好似食緊甜品咁。因為佢杰，我會鏟起一羹奶蓋食，之後再飲一啖，比較分開。對比起其他純堅果奶蓋飲品，呢個嘅堅果味比較少，朱古力味比較濃，好似食緊榛子醬咁。就咁食你可能會怕滯，當你將奶蓋同茶一齊飲就唔會覺得好膩。雖然個奶蓋先係主打，但係下面個茶都好飲㗎！我叫咗呢個係伯爵茶，因為我叫咗無糖所以個茶味都好出好香。無糖萬歲！朋友叫咗繽紛火龍果奶蓋茶（$38，凍、無糖、少冰），呢個係佢嘅心得：火龍果茶清清地幾好。奶蓋同平時好唔同，因為係堅果奶蓋，食落去係榛子味。間唔中又食到啲火龍果肉，幾健康啦，應該可以幫助排便。