真味鮮廚 (Closed)

每次嚟呢間亞太中心唔係韓燒就放題，第一次嚟飲茶。一行三人，其中同行長輩推薦，果然食物質素唔錯，價錢抵，坐位唔密亦坐得舒適。翡翠筍蝦餃皇，唔算大粒，不過蝦肉爽口。鮮竹牛肉球，無特別，都唔錯。黑金流沙包，個包做得好軟，流心餡多啲會更好。蘿蔔千絲酥，蘿蔔條夠粗，食到蘿蔔嘅口感。百花炸兩腸， 油炸鬼唔脆，腸粉幾軟滑。下午茶孖寶：蛋黃千層糕，皮蛋瘦肉粥，長輩形容抵過大排檔，係咁讚個千層糕好味叫我哋試。蜜味叉燒米線，都係長輩推介，話呢度啲肥叉好食，雖然唔係肥，但係入口都幾鬆軟。美極安格斯牛肉崧炒飯，唔係咁鐘意食炒飯嘅我都覺得好味，肉有牛味，炒得乾身唔油，粒粒分明，飯唔會太硬太淋啱啱好。