泰嘟嘟

Open Now

Now Closed

今日約個friend放咗工响大角咀食晚飯，大家都想食泰菜，於是佢帶我去。個名幾特別🤔，入到店先明白，因為店內卡位設計有如泰國嘅嘟嘟車，四周裝飾好有泰國feel又色彩繽紛，好靚好特別😍。此店價錢實惠，如果叫2人或4人餐仲抵😍，可惜我哋比較細食，最後散咗幾款食物。香蔥蒜蓉包 $48.-一碟有6件，外形如磚頭，每個面都鋪上牛油及蒜蓉，烤個後好香脆惹味😋。沙嗲串燒 (半打)$88.-雞豬各3串，大大串燒得香口，肉質軟腍濕潤，配上自家調配嘅沙嗲醬，又另一番風味。炭燒豬頸肉 $78.-上枱時有一個小爐，微火熱住啲豬頸肉，呢點幾讚👍，豬頸肉外面焦香，肉質軟腍，點埋泰式酸辣汁一齊食，零舍惹味又醒胃。炒通菜 $68.-通菜加埋蒜蓉及馬拉盞一齊炒，既香口又惹味，十分好食。珍多冰 $26.-一杯有椰香味嘅凍飲，十分消暑解渴又解膩，就係呢餐完美嘅結束😊。