古早味休閒台灣 (Closed)

一排冇食台灣美食，今晚嚟左旺角呢間台灣餐廳食，因為之前食過佢喺銅鑼灣嘅分店都幾好食，而旺角呢間新開餐廳位置方便，喺旺角地鐵站上左地面轉過灣去到女人街街口就見到，落雨都冇有怕。坐低之後叫左個紹興醉蝦，呢款小食有凍食同埋熱食兩種，我就揀左凍食，上枱時發覺原來仲伴有杞子上碟，啲杞子入口時又發現原來都有香濃嘅紹興醉味，白色長碟上面有八隻紅紅欲醉嘅醉蝦，亦由於顔色紅紅嘅醉蝦放左喺純白嘅瓷碟上，光是看到顔色嘅配搭已經令人開晒胃口，唔怪得大xx快餐連鎖店主色系列用橙橙紅紅色，原來真的有視覺影響胃口呢回事，醉蝦大小適中，肉質彈牙，最緊要就係啖啖肉之餘仲有啖啖香濃嘅紹興酒酒香。另外仲叫左台式小雲吞，一碟有12粒bite size嘅小雲吞，最欣賞喺佢自家製蒜香醋，令人胃口大開。食完味道濃郁嘅嘢，於是叫左桂花茶中和一下，茶壺內好多桂花，仲有小蠟蠋保持茶的熱度，值得一讚。