若不是朋友介紹，斷估我也不會中上去美食廣場開餐。
西九龍中心，是筆者小時的蒲點，曾幾何時幾風光，有冰場，有機舖，甚至乎室內過山車，當時係十分之巴閉。
再次踏足這Food Court，我相信十個檔口有十個都已經唔同晒，現時仍存在的，基本上一間都未食過，大概是這裡人流太少、生意難做? 抑或係我太耐沒有重回舊地? 定還是連呢度既租金都貴到飛起?Whatever啦! 我一心去找那間朋友推介的うどん屋。
叫得烏冬屋，當然是吃烏冬為主，雖然仍有飯供應。考慮了兩秒鐘，便向店主柯打一客牛肉烏冬。烏冬賣相幾對辦，最吸引正是中心的一隻溫泉蛋，真想不到Food Court會遇到如此誘人的好東西。
溫泉蛋當然可愛，自己動手加入了適量的薑蓉和蔥花，起動了！烏冬口感尚算煙韌，牛肉質素合格，最重要的是，果真有日本小店的風味。
另外點了炸雞，十蚊有三件，經濟實惠。即叫即炸的出品，熱呼呼的，一口咬下，皮脆肉嫩，肉汁豐盈，味道十分之好，比起連鎖雞快餐店，高出十萬倍有多，有衝動再去買多三兩份。
多謝朋友的好介紹，單是這炸雞，已值得我重來。
