巧合地留意到YAHOO團購$59(+$22服務費)食西餐，都幾抵呀，咁就買黎試下啦！
由於13/3將會到期，所以我5/3打電話想BOOK 8/3，
他說整個星期已經FULL哂，佢提議我不如BOOK定下星期，
於是就BOOK左12/3 7:30PM。
我們7:00PM已經到左，所以試下WALK-IN，
佢比左張4人枱，而且要8:30PM前交枱，冇問題啦，
被安排個位唔係特色位，好似普通茶餐廳。
留意到個個都因為團購而來，因為大家都交左張紙比侍應！
睇以下呢份MENU，未食前的確幾吸引嫁！
只係睇左一陣MENU，未落單，有個侍應放低左份餐，
我地即提出：我地未落單！！！！！！
個侍應冇任何回應，只係望一望我地，就繼續走左去派餐，
之後又行左埋黎，不發一言，拎走左份餐！真係好無奈，呢度D侍應真係好特別！
我落左單唔夠兩分鐘，我份豬仔骨已經到，好高效率呀！
我同男朋友感到好奇，唔係應該有頭盤同餐湯先咩？於是又問一問，係唔係我地嫁？
佢又好快放低，不發一言走左去！完全冇回應！真係無奈Ｘ10000000000.....
接著，佢終於為我放上頭盤同餐湯＝＿＝
精選是日餐湯：忌廉粟米火腿湯：幾好味呀！不過我覺得比罐頭湯稀D。
頭盤包括：
－田園沙律，得幾條...
－歐洲北海藍青口配意式油醋(冷盤)，冇味的！
－巴馬火腿焗岩蠔，唔錯的！
－法式鵝肝醬多士，塊麵包勁淋，鵝肝醬冇味！
－法式薯茸田螺塔，好似同MENU有少少唔同，係煙三文魚，都唔錯嫁喇！
紐西蘭西冷牛扒配(6oz)配牛肝菌汁：男朋友話都算唔錯，起碼比我件豬仔骨好好多！我食左一啖，D肉幾鮮味。
美式半邊豬仔骨拼紅酒鴨胸肉(配薯菜)：我比左件男友食，男友說：係咪要練牙力？
Ｄ肉真係好硬，好UN！咬勁耐都咬唔爛！最好味係薯條！好過M記！
甜品，MENU上的甜品係法式木糠脆脆杯1杯 或 法式燉蛋1客，
我地點餐時每款叫左一樣，但上菜時就見到３盒唔知咩黎，
好彩食前我已經上OPENRICE睇左食評，預先有心理準備！
一盒係CREAM(唔好食，又唔滑)，一盒係提子啫喱(勁酸)，
黃色果盒真係唔知咩黎，味道怪怪，仲食到粉粉地！
