餐館就喺西鐵站YOHO Mall附近位置，好方便 好容易搵到。離遠已經見到大大個招牌啦，餐館喺樓上位置嘅。
上到去四人被安排坐卡位，旁邊仲可以透過櫥窗睇到師傅喺廚房忙碌嘅身影。一坐下店員就詢問飲咩茶同送上餐前小吃花生及木耳各一小碟。
今次只有我一人係比較大食，朋友們都係細食之人，所以嗌得比較少嘢食。打開餐牌睇睇，食物選擇非常多，有少少花多眼亂添。
食上海菜小籠包係必點，上台新鮮滾熱辣出大煙
一啖咬開小小皮 湯汁已經蜂湧而出，好鮮甜！皮薄而肉質鮮嫩美味，非常好食！
餐廳嘅招牌菜。石鍋飯上台時仲發出"咋咋"聲，香氣撲鼻而來。飯面鋪滿金黃嘅蟹粉，撈一撈仲見到有飯焦，急不及待想放落口
蟹粉份量好足，蛋炒飯炒得好香，所以每一啖飯食落都好甘香可口，飯焦香口程度更甚。我覺得個石鍋飯份量唔算大，二人份量應該剛好，四人分 每人半碗好似唔係幾夠喉，哈哈。
回鍋肉係朋友話要嗌嘅，我係第一次食。薄薄嘅豬肉片同椰菜加上辣椒青椒一齊炒非常香口好味，個醬汁尤其好味。呢道菜送飯一流，但亦相對油膩。
花雕醉雞亦係食上海菜必點。雞肉好香濃入味，比較滑身，將雞肉連一啖花雕酒送入口，好味到滿足！
肥而不膩，晶瑩可口係我對鎮江肴肉嘅印象。仲記得第一次食呢道菜係朋友介紹，朋友話唔好睇佢外表好似好肥咁，但食落係另一種感覺，而且製作呢道菜好考工夫，於是我即管一試，最後當然一試愛上！
可能雪得太冰凍入面有少少結咗冰，擺咗好一陣子再食。食嘅時候就係覺得一啲都唔肥，豬手肉質鮮嫩，入口化開，如果皮凍部份再多少少口感就更好啦！
食完一舊又忍唔住想食多舊，因為好夠味所以我無點任何嘢食，可以點鎮江醋食 又有另一番風味。
最後仲嗌咗個清新開胃小食 手拍青瓜。雖然普通，但同樣做得出色，青瓜非常爽脆入味，食後齒頰留香，青瓜每塊大小適中一啖入口剛剛好。
整體而言呢一餐係大大滿足！一個非常好嘅第一次嘗試。下一次再來希望可以多啲人，咁就可以試下片皮鴨同其他特色菜色。
