鱷魚泰國餐廳 (Closed)

天氣甘熱但無阻我地覓食，今次去左有小泰國之稱既九龍城食泰菜，而且呢間係全泰國人主理，正宗泰國菜。首先歎杯芒果沙冰，好足料，上枱已經聞到芒果香，係炎炎夏日好消暑。然後係西施柚沙律，有別於其他餐廳做法，加左自家制酸梅油，惹味又開胃，既能吊出蝦鮮同時中和柚子既酸，一舉兩得，誠意推薦。炸蝦餅同豬頸肉不錯，份量好足。蝦餅彈口香脆，豬頸肉燒得岩好，感覺好juicy。到最愛冬蔭公，至少六七隻中蝦，以及秀珍菇，由於用料十足，所以湯好濃好鮮甜，椰汁味唔太突出，唔會搶去辣吅鮮味，而且足夠六七人飲。明爐烏頭魚，烏頭完全冇泥味，係肉碎，秀珍菇，西芹既上湯既襯托下，魚鮮又滑，大人小朋友都中二。香芒海鮮炒飯見得多，香芒蟹肉炒飯比較少見，感覺更為高檔，飯粒分別，至少大半個芒果加蛋，蟹肉，以及其他小配料，顏色鮮豔，芒果香甜，蟹肉鮮美，配搭吾錯。最後推介，小鳥等愛，誠意之作，蝦膠包住中蝦，點上酸梅醬，有啲似中式炸蝦球，不過感覺更細緻複雜。蝦膠彈牙，蝦肉爽，雙層享受。小鳥頭則用上薯蓉--creamy。賣相十分吸引，為呢餐畫上完美句號。