Makuma (Closed)

下午茶休閒時段，想嘆吓甜品，知道這間店獨有麻糬窩夫，好吸引。點咗朱古力麻糬窩夫，上碟賣相好靚，四塊厚身窩夫，焗得脆身，上面鋪住煙靭麻糬，超濃朱古力味，冇得彈 。搭配海鹽焦糖醬及甜甜餅乾碎，再有另一種口感黑糖蒟蒻，爽甜清新，好食到不得了。叫咗一個飽肚嘅醬燒飯糰，廚師好細心，將飯糰每邊都煎香咗，入口香脆，零舍好食。一個上面鋪滿吻仔魚乾，鬆鬆脆脆；另一個就有大大粒鮮味爆燈嘅三文魚籽，入口爆脆，雙重口感夠特別。一杯玫瑰檸檬梳打，漸變嘅粉紅色，有幾粒玫瑰花瓣點綴，晶瑩清澈，檸檬清新，梳打清涼，一飲就透心涼，愛不釋手。凍焦糖鮮奶咖啡好香濃，焦糖甜度剛剛好，配上幼滑嘅咖啡好夾侍應服務夠細心，日系設計，環境舒適。好期待下星期再嚟試下 “二人前火鍋” 或餐牌上各種日式美食。