可可研究室 (Closed)

最近禮拜日都要到青年廣場活動嘅關係，開始係附近搵嘢食，而呢間可算係第一間想廣而告之嘅地方。每次都係搭地鐵過來，經過天橋，兩邊有最近花開得盛嘅鳳凰木，今日，更係由天光一直落雨，涼陣陣～～～對於呢個公共建築，有時都幾令人費解，如若上去消閒下，真係過三關斬六將，上完長長嘅電梯，再按電梯上去12樓，與青年旅社毗鄰嘅Cocoa Lab，營業時間不長，但每個鐘數都幾乎爆滿，除與食物質素取勝外，更重要嘅係佢環境一流，少有能在同區見到嘅露天茶座，忙完之後停落來，坐坐聊聊，品一杯咖啡，何其寫意！Spaghetti Carbonara - 調味得好好，不過配料略鹹。由於冇食早餐，友人餓到未來得切比我部相機食先，已經將擺得靚靚嘅意粉摧殘咗～天使麵👼啊～Angel hair，最幼細嘅意粉，配上茄汁同雜菜雞扒，好滿足哦！蘋果燒雞沙律～有賣相，滋味也不錯，可惜沙律裡面有d果仁有油益味，店家要注意一下！唔知係咪因為假期又落雨，我哋去到已經滿座到要坐草皮玻璃前嘅檯，但呢種感覺好舒服，三五知己坐埋一齊，睇睇藍天，真係假期之一大樂事！