鮨一日本料理 (大壩街)

Open Now

Now Closed

自從唔再食元氣，都好努力去搵一啲新既日本餐廳，今次呢間真係食到一肚氣。晚市黎食，個價錢對我黎講算係中上啦，都有啲期望。我坐吧枱，其他侍應都好正常有禮貌，但嗰三個壽司師博真係好唔掂，本身態度已經好輕挑，好似三個中學生係度玩咁，互相傾計，講笑，印象已經好嘛嘛，但最大問題係佢地準備食物既態度同埋係咁講粗口！係講緊大聲互相問候娘親同性器官既粗口，我聽到耳都突埋，但嗰陣已經叫左嘢食，無得走，我其實好想出聲叫佢地尊重下自己，尊重下食客，但係女友㩒住左我，驚佢搞我地啲嘢食。我見到有件海膽冧低左，然後個師博是但撥番起身就出俾客。我唔知點解間鋪既店長可以完全唔理，定係因為嗰三條友其中一個已經係店長，我覺得係完全不知謂。日本壽司店吧枱既設計，係俾食客可以同壽司師博交流同欣賞佢既手藝，但呢間鋪完全係侮辱左呢個設計，大佬，我去茶記大排檔啲員工都無咁爛口啦。嘢食係ok既，海膽新鮮，啲三文魚籽細粒左啲，都算對得住個價錢，但200蚊一個人有太多更加好既選擇。