Sugar Lava (Closed)

話說最近觀塘開源道附近開左好多正野食，又有東喜茶，又有梳乎里pancake，又有千層蛋糕，之前食過一次好食既梳乎里，搞到念念不忘，買左喜茶好想試一下呢間梳乎里。因為係新店既關係，都有啲人排隊，我前面有3定4張單，所以比左錢之後都等左20分鐘。佢有一張細枱比你，但無位坐，你可以買完食係到食。一份兩件梳乎里58蚊，呢個價錢其實唔平，同埋佢一日最多得2隻味，原味+是日精選，我呢日食係朱古力，其實我更想食紫薯味，但無辦法啦。等左20分鐘，終於到我，個樣其實唔錯！好期待呀！...食一啖落口，嗯...我應該係期望過高，梳乎里一啲空氣感都無，係一pat粉漿，無乜朱古力味，要靠朱古力醬帶味，同之前食既差太遠，食左一個之後，已經膩到唔想再食，太粉既關係，佢都令到你好飽。好辛苦食左1.5個，真係食唔落，唯有放棄，而我都唔會再食呢間梳乎里pancake。