本來想食吓燒魚之類嘅嘢，碌完openrice見呢間似乎幾得意就過去試吓。
間鋪既然主打天婦羅，雖然我平時少食呢啲熱氣嘢，但一場嚟到就試啦。
睇住份menu，海膽天丼同海鮮天丼爭持咗三分鐘之後，海鮮天丼因為冇南瓜試倒多啲嘢同經濟少少所以贏咗
一嚟係個湯先。
鹹味夠嘅，但麵豉味唔出。普普通通咁啦。
之後就係主菜，擺盆好靚仔。
個海鮮天丼有蝦，魷魚，仿蟹棒，流心蛋，茄子，紫菜，菜心苗同蓮藕。
炸物逐樣講:
蝦:
炸粉唔太厚，都ok有蝦味，唔錯。
魷魚:
ok嘅，但唔覺得太特別，可能係我差不多埋尾先食佢啩？
仿蟹棒:
呢嚿嘢我本身對佢冇期望，粉唔太厚，唔散唔太油已係合格有餘。
流心蛋:
初見比預計熟多咗少少，但都有流心，幾滑，唔錯。
蓮藕:
炸粉唔太厚，唔太油，唔錯。
紫菜:
正常貨色
菜心苗:
呢件睇就靚仔食就跪低。菜心本身唔點重味，加埋炸粉之後，就算係夾埋一齊食都唔點食得出菜心味。再講食食吓炸粉自己甩埋出嚟，唔通真係食炸粉脆片咁搞笑??!
我明炸紫蘇唔係個個頂得順佢陣味，但起碼我知佢做咩吖……呢個菜心苗天婦羅……真心fail。
茄子:
嗦油記主角。炸粉唔厚嘅，但嗦油嗦到東坡肉嘅級數，唔掂。
之後個沙律係正常貨色。
是日MVP:枱上嘅飯素
呢個真係幾好味吓，不過佢都有番咁上下鹹，落天婦羅汁之後要就番份量。
整體嚟講肉類炸物ok但菜類就真係唔係樣樣得。下次就算嚟食可能叫其他主食再加炸物好過。
