海記魚蛋粥麵 (Closed)

喺馬鞍山想搵茶餐廳食，「海記」絕對係一個上佳嘅選擇！除咗食物質素之外，呢度招呼都唔錯㗎👍🏼 (註：馬鞍山區有幾間茶記，包括有連鎖店同私人嘅，啲店員面口超臭，對啲客人呼呼喝喝⋯⋯) 呢度啲店員起碼有禮貌，而且只要有位，你鍾意坐邊都得，唔會趕你坐指定嘅位置！🍽 常餐 ($45) 揀咗薑絲豬潤麵 + 松露炒蛋 + 脆豬 + 凍檸茶。啲豬潤好爽口，大大件都算厚切。不過原本係叫出前一丁嘅，點知嚟錯咗蟹王麵。算啦，橫掂未食過蟹王麵，就試吓啦！最後都係覺得出前一定好食啲，麵質比較爽口，蟹王麵嘅口感就比較糊口⋯⋯ 炒蛋就一般啦！🍽 豉汁蒸鯇魚 ($60)，可以揀跟飲品、紫菜湯或者油菜。舊鯇魚質素都OK，鍾意食腩位仲可以同阿姐講😊🍽 魚骨豆腐湯 ($58)，裡面有三大舊魚頭、豆腐、生菜絲同葱花。一鍋夠兩三個人飲！味道都幾清甜，唔會好重味精😋🍽 魚腩粥 ($32)，都幾足料，粥底夠棉，食到最後都唔會變水。🍽 叉燒腸 ($17)，味道都算OK！🍽 油炸鬼 ($9)，好油，麻麻地！呢度價錢都算大眾化，衛生同環境都算OK嘅。