一坐低即刻嗌杯薄荷沙冰同椰汁沙冰降降溫。薄荷沙冰真係冇得頂，飲落個種冰涼感由條喉嚨直落個心口，爽到震！甜度適中，薄荷味好出，唔會似漱口水。椰汁沙冰就香滑啲，椰香味好濃，好似飲緊溶咗嘅椰汁雪糕，兩杯都咁正。
前菜個柚子沙律好開胃，柚子肉爆汁清甜，同埋啲辣辣哋嘅醬汁、花生碎、同埋啲蝦乾好夾，口感豐富。跟住個豬肉生菜包一上枱就聞到好香，炒香咗嘅豬肉碎帶啲香茅同金不換味，用塊新鮮生菜包住食，一啖放入口，菜嘅爽脆同肉好惹味
主菜方面，個咖哩雞南爪盅賣相已經贏咗，用成個南瓜上，好盞鬼。個咖哩係溫和嘅黃咖哩，椰香味重，雞肉幾嫩滑，最正係啲南瓜肉，炆到淋晒，索盡咖哩汁，甜中帶鹹，撈埋蒜蓉包食真係無得彈！啲蒜蓉包烘到脆卜卜，點咖哩汁係絕配。
全晚高潮係個火焰新派老虎蝦，即場點火，成串火燄咁，視覺效果滿分！啲蝦大大隻，肉質爽口彈牙，好惹味。
泰式燒牛肉配秘製醬汁夠晒粉嫩，加埋秘製醬汁就真係唔錯，酸酸地幾開胃。
總括來講，「泰斗」無論環境、服務同食物質素都交足功課，尤其個火焰蝦同兩杯沙冰，印象深刻！一定會再嚟幫襯！
