一坐低我就即刻知道個分別啦！個侍應姐姐佢問我地飲乜嘢茶，佢抱住一個盤，有各種唔同味道嘅原片茶葉！我即刻加左唔少分，因為真係第一次會有餐廳咁細心俾你揀你想飲嘅茶葉。我揀左出面比較少見既人參烏龍，而女朋友就揀左杭菊花。
我同女朋友當然好開心各攞住自己嘅香茗慢慢沖。我哋唔係好肚餓，冇叫到啲好重型嘅晚餐。反而我想試小小清淡嘅上海菜式。於是我就叫左我最鍾意嘅清炒土豆絲、特色天使魔鬼小籠包、火腿上湯浸冬瓜、酸菜白肉鍋，同埋最後留返少少肚叫買個甜品
我地點完菜之後，店員好細心放左一個掛牌係我地張台度，原來係提示你食完正餐先叫佢地上甜點 ! 又加左分!
上菜啦上菜啦 !
清炒土豆絲非常之爽脆，味道亦都好入味非常之正，佢帶少少美味嘅酸辣咁所以好開胃
酸菜白肉鍋酸菜味道調校到啱啱好，微酸味但冇整損成煲湯底，配上黑木耳芽菜個湯都好鮮味好豐富。我鍾意到連湯都飲埋。
個天使魔鬼小籠包，黑色小籠包佢係黑松露味，表面有蟹皇。個味道好鮮，有湯汁流出來。白色就用魚子做裝飾，肉質同湯汁都有少少唔同。
可以一籠試到兩種，好開心。
個火腿肉冬瓜如果食濃味嘅朋友就唔好叫佢啦。因為佢好淡，但係你食落就會到佢個湯會有淡淡的火腿香味。冬瓜都燜得剛剛好，好𣺉好清甜。
最後大家食到差唔多就叫埋個榛子饅頭。饅頭炸完，再加上榛子醬、煉奶呢個配搭真係無得輸。饅頭炸到香脆，為呢餐畫上完滿句號。
整體來講你一餐我好滿意，誠意推介鍾意食新派上海菜嘅朋友過來試一試!
